Union Home Minister inrawlh turin an ngen

Assam-a BJP MP te chuan Assam-Nagaland ramri-ah buaina lian tham zawk a chhuah mai an hlauhthawn thu tarlangin Union Home Mi­nister Rajnath Singh chu a rang lama inrawlh turin an ngen.

BJP MP- Ram Prasad Sharma, Rameswar Teli leh Kamakhya Prasad Tasa te chuan Union Home Minister Singh hnena lehkha an thawnah Jorhat leh Golaghat district-a Nagaland ramri chu buaina chhuak mai thei dinhmuna a awm thu an tarlang.

Jorhat district, Mariani khaw chhehvela Nagaland ramri boruak chu a ṭha lo hle a, sorkarin hma a lak thuai loh chuan buaina lian tham zawk a chhuah a hlauhthawnawm a ni, tiin MP te lehkhathawn chuan a tarlang a, tharum thawhna thleng te leh rukruk hluar lutukte chuan ramri chhehvel boruak a tiralmuang lo a ni, an ti.

Assam BJP MP te chuan Assam leh Nagaland ram inchuh thubuai avangin mi tam takin nunna an chan tawh thu an tarlang bawk a, sorkar laipui a inrawlh loh chuan ramri-ah tharum thawhna a thleng nawn leh thei a ni, an ti.