Naxal helte Assam leh AP-ah inkhuar an tum: Sorkar laipui

Sorkar laipui chuan Naxal helte chu Assam leh Arunachal Pradesh-a inkhuar an tum thu tarlangin, state pahniha power project atana tui khuah mekah dodalna thu an thehdarh tih a tarlang tel bawk.

Minister of State for Home Affairs Haribhai Parathibhai Chaudhary chuan Rajya Sabha inkhawma Congress MP Anand Sharma-a zawhna chhangin he thu hi a sawi a, CPI (Maoist) helte (Naxal) chuan hmarchhak biala helpawlte nen inlaichinna leh thawh hona neih tumin pawl din thar an tum a ti.

Union Minister Chaudhary chuan CPI (Maoist) hian Manipur-a helpawl, Revolutionary People’s Front (RPF) leh People’s Liberation Army (PLA) te chu thawh hona a neihpui tawh niin a sawi bawk. Hel pawlte hi an sipaite training, funding leh ralthuam supply kawngah an thawk dun tawh niin a sawi bawk.

CPI (Maoist) hnuaia Upper Assam Leading Committee (UALC) te hi tunah Assam leh Arunachal Pradesh-ah an chetla mek niin Union Minister Chaudhary chuan a sawi a, pawikhawihna hrang hrangah an inhnamhnawih a ni, a ti.

UALC te hian Assam mi eng emaw zat an member-ah an la tawh bawk a, Assam mite power project atana tui khuah mekte dodaltuah an hmang bawk a ni, a ti.

Hetihlai hian Minister of State for Home Affairs Kiren Rijiju pawhin zawhna dang a chhannaah hmarchhak helpawlte chuan China-Myanmar ramri khua aṭangin ralthuam an lalut ṭhin a ti a, hetihlai hian China a inhnamhnawih leh inhnamhnawih loh thu chu an hriat loh thu a sawi.