Hmarchhak state te'n organic farming policy nei lo

Sorkar laipui chuan hmarchhak bialah organic farming tihchangtlun tumin bei mah se hmar­chhak state te chuan organic farming-ah policy mumal tak an nei lo.

Union Budget 2015-2016 ah sorkar laipuia BJP sorkar chuan hmarchhak biala organic farming tihchangtlunna atan kum hmasa budget-a cheng vaibelchhe 33 a dah aṭangin cheng vaibelchhe 125-ah a tipung a, Prime Minister Narendra Modi chuan hmarchhak chu India rama organic farming hmunpui a nih theih thu a lo sawi tawh bawk.

Hetihlai hian DoNER Minister Jitendra Singh chuan Lok Sabha in­khawmah hmarchhak biala organic farming scheme kalpuina tur chungchanga Assam BJP MP Rameswar Teli-a zawhna chhangin organic farming scheme kalpui nan hmarchhak state tinte tan sum rua­hman a la nih loh thu leh North Eastern Council-in hmarchhak state te chu organic farming thehlar tura a hriattir loh thu a sawi.

DoNER Minister chuan hmarchhak state te'n organic farming policy an la duan loh thu a sawi bawk a, Assam pawhin policy a la duan loh thu a sawi. Mahse Assam-ah hian Rashtriya Krishi Vikas Yojana (RKVY) hnuaiah ram hectare 4,500-a zauah organic farming kalpui a nih thu a sawi bawk.

Assam sorkar chuan state chhunga Mission Organic Farming project kalpui tura rawtna sorkar laipuiah a thlen tawh a, hemi atan hian cheng vaibelchhe 9.6 a dil.