Nagaland police te'n SVMS tlangzarh

Nagaland police te chuan Nilaini khan India rama a hmasa ber, SMS Vehicle Monitoring System (SVMS) an tlangzarh.

Nagaland Police te chuan SVMS hnuaiah hian Nagaland-a lirtheite chu Cloud storage hmangin an data an register vek ang a, lirthei bo kaihhnawihah mipuite'n awlsam zawkin SMS hmanga an report theih dawn bakah police te chuan police check post te chu rang zawkin information an pe thei dawn a ni.

SVMS tlangzarhna inkhawmah State Home Minister Y.Patton chuan Nagaland police te'n mipuite tana beiseina thar siam a, SVMS an tlangzarh thei chu lawmawm a tih thu a sawi a, police te hnathawh kawngah awlsamna a thlen ngei a beisei thu a sawi.

Home Minister Patton chuan Naga­land-a lirthei ruk hluar ta lutuk chu a ngaihmawh thu sawiin, lirthei zawn hmuh loh tam chuan lirthei ruk a tihluar a ni, a ti.

Tun hnaia Nagaland-a tharum thawhna thleng chungchangah Patton chuan Naga mipuite'n remna leh muanna a awm an duh tak zet tawh a, mahse mi ṭhenkhat chuan mipuite hlauh tur thil siam an ching a ni, a ti. Wokha, Kohima, Dimapur leh Mokokchung district-a bomb puak bakah Kohima-a inkahna thleng chu pawi a tih thu sawiin, pawikhawihtu man chhuah nan sorkarin theihtawp a chhuah tur thu a sawi bawk.

Nagaland Home Minister chuan police te chu mipuite beng leh mit an ni, tiin mipuite himnaah mawhphurhna sang tak an nei a ni, a ti.

Nagaland DGP L.L Doungel pawhin thu sawiin, SVMS an tlangzarh tak chu pawikhawihtute tana vanduaina a nih tur thu leh a hmangtute tan pawh a hmanna tur dika hman a nih loh chuan harsatna thlentu a nih theih thu a sawi.

Doungel chuan dan leh thupek lek­kawh­naah police te chu technology thar chhawr ṭangkai thiam turin a ngen bawk.