Manipur: Jiribam district-ah khaw hotu farm house 2 hal

Manipur-a Jiribam district-a Nungkhal area-ah Hilghat gram panchayat pradhan L Somorendro-a farm house pahnih chu helpawlten an halsak tih police ten an sawi. Hemi hma, Inrinni zing khan helhoin orobekra police station huamchhunga khua an bei bawk.

Security force te chuan farm house hal a nih chungchang hi an chhuizui mek a ni.

He buaina hi New Delhi-a Meitei leh Kuki MLA ten tualchhung buaina thleng mek chungchanga inremna thu sawi tura inbiak hona an neih hnu lawka thleng a ni. Nikum May aṭanga Imphal Valley-a cheng, Meitei leh tlangrama cheng, Kuki te inkara buaina chhuak kaihhnawihah hian mi 200 chuangin nunna an chan tawh a, mi sing telin chenna in an chhuahsan tawh bawk.

Jiribam district hi a zau thawkhat avangin Imphal Valley-a buaina thlen tlemna ber a ni ṭhin a, mahse kumin June thlaa loneitu pakhat ruang an chhar aṭangin buaina hi a punlun chho ta a ni. Buaina chhuak vang hian mi sang chuangin an chenna in chhuahsanin, relief camp ah an awm mek a ni.

Police ten hel 16 te thah an nih tawh thu sawi

Central security force leh Manipur police ṭangkawp chuan kumkhat liamta aṭanga helpawl pawikhawih zawnga chet ṭhinnaa inhnamhnawih, mi 16 te chu thah an nih tawh thu an sawi.

Manipur Police 133rd Raising Day hriatrengna an hmannaah helpawlte chetna leh ruihhlo zawrh an do dan chungchangah thuchhuah hi an siam a ni.

Kumkhat liamta aṭang khan helpawl lakah police te hian case 762 an lo ziak tawh a, helpawl zinga mi 291 manin, ralthuam 1,000 chuang anlo man tawh bawk.

Buaina kalmekah hian police te chuan opium chinna hmun acre 651 a zau an ti chhe tawh a, Narcotics Drugs and Psychotropic Substance Act (NDPS) hnuaiah case 97 ziahluh ni tawhin ruihhlo zuar mi 109 an man tawh bawk a ni.

Security operation an neih piahlamah hian Manipur police te hian blood donation camp, 1st Manipur Rifles Banquet Hall-ah an buatsaih bawk a, hetah hian police 28 ten thisen an pe a ni. Remna leh muanna kenkawh a nih theih nan mini-marathon chu Bishnupur leh Churachandpur district ah an huaihawt bawk a, thupui atan "Run for Peace" tih an hmang. Mi za chuang telin heng zingah hian police, CAPF, Army leh tualchhung ṭhalaite an tel.