Tripura-ah lungawi lohna lantir FONECO-in PM hnenah memorandum thehlut

Tripura state-a political party ṭhenkhat leh pawl hrang hrangte chuan hun rei tak chhung an state pawhtu kawngpu a chhiat avanga an harsatna tawh mek ngaihthah a nih avangin lungawi lohna lantirin hmun ṭhenkhatah kawngpui an dang.

Lungawilohna lantirtute hian tyre halin, sorkar chu mipuite ngaih thah leh hmala chak tawk loah niin an sawi. Hetih lai hian civil secretariat lungkhung tumtu Trinmool Congress mi leh sa 25 te chu police ten an man. State PWD Minister Badal Choudhury, Transport Minister Manik Dey leh Food and Civil Supplies Minister Bhanulal Saha te chuan thuthar thehdarhtute an kawm nghal a, an harsatna tawh dante mipui hriatah an puangzar a ni.

Choudhury chuan opposition party te chetdan chu a dem thu leh awmze nei loa sapa tal tumna a ni a ti a, mipuite tawrhna belhchhah leh boruak tichhetu an ni, a ti. An harsatna tawh mek sukiang tura hmalak mek a nih thu leh sorkar laipui leh ṭhenawm state, Assam te chu hmalakpui tura ngen an nih tawh thu a sawi bawk.

National Highway chhe zual lai, lirthei kaltlang theilohna hmun hi metre 300 vel chauh nia tarlan a ni. Supply Minister Bhanulal Saha chuan tanker ṭhenkhat chuan kawng chhe zual lai hi an paltlang tawh tih sawiin, an harsatna chuan ziaawm lam a pan thuai a beisei thu a sawi. Food Corporation of India leh Indian Oil Corporation te chuan mipuiten ei leh barah harsatna nasa lutuk an tawh loh nan hma an la ve reng a, petrol leh diesel pawh Bangladesh kaltlanga thawn luh reng a la nih thu Saha chuan a sawi.

FONECO ten PM hnenah memorandum thehlut

Federation of North Eastern Consumer Organisation (FONECO) te chuan Zirtawpni khan Prime Minister Narendra Modi hnenah Assam-Tripura National Highway siam ṭha tura hma la tura ngenna memorandum an thehlut.

FONECO te memorandum-ah hian thla hnih chhunga an harsatna tawh hrang hrangte tarlan a ni. Chakkhai lamna kawngpui chhia avang hian bungraw phur truck sang chuang zet chu an tangkhang a, lirthei dang eng emaw zat an tangkhang bawk. Thla eng emaw zat lirthei kaltlang theih loha a awm vang hian nitin mamawh chawlut turin kawng hrang hrang dap a ni a, hei hian thil man nasa takin a tisang tih tarlan a ni bawk. Tripura hian oil-ah harsatna nasa tak tawkin, lirthei number kawpkim lo leh kawp kimten a inchhawka oil an lak a ngaih phah hial a ni.

Memorandum-ah hian Assam-a Karimganj district-ah oil phur truck ṭhahnem tak an la tangkhang mek tih tarlangin, Tripura state chhunga petrol pump eng emaw zat chu khar a ni, an ti. FONECO chuan Modi chu Tripura mipuite tawrhna hriatthiampui tur leh a rang thei ang bera hma lak sak turin an ngen a, National Highway chu a rang thei ang bera siam ṭha turin an ngen a ni. Heng bakah hian harsatna an tawh chhunga chakkhai lamna kawng pawimawh Bangladesh chu inbiakna neihpui tura an duh thu an sawi bawk.

Hetih lai hian Ministry of Road Transport & Highways chuan thuchhuah siamin, sorkar laipui chuan PWD leh National Highways and Infrastructure Development Corporation Ltd (NHIDCL) kaltlangin Tripura-a Road Project kalpuina turin cheng vaibelchhe 4,000 a ruahman thu a tarlang. Tripura hi NH km 853 zeta thuiin a paltlang a, km 731 hi state PWD enkawl niin, a bak km 122 erawh NHIDCL-in a enkawl a ni. Tunah hian project pali kalpui mek awmin, hemi atan hian vaibelchhe 1,162 ruahman a ni. Central Road Fund (CRF) hnuiah kum 2016-17 chungin kawngpui sialna turin sorkar laipui chuan vaibelchhe 20.42 ruahman sakin, scheme hrang hrang hnuaiah road project kalpui mek 12 a awm mek a ni.

National Highway project pali Agartala – Khowai, Agartala-Udaipur, Udaipur leh Subroom te kalpui leh mek a ni a, NHIDCL ten thawkin, kum 2018-a zawh hman tura beisei a ni. Tripura hian National Highway-8 leh NH-44 Lowairpoa - Churaibari chhia avangin harsatna a lo tawk fo tawh ṭhin a, tunah hian a thawm ṭhat hna thawh mek a ni a, Joint Secretary leh Chief Engineer ten an vil a ni.