Assam-in zirna leh hriselna ngaipawimawh dawn

Assam state Finance Minister Himanta Biswa Sarma education leh health sector te chu sorkarin a ngaihpawimawh tur thu a sawi.

Sarma chuan zirna tihmasawnna turin kawng hrang hranga hma lak a nih tur thu sawiin, academic session thar aṭangin Class IX & X te tan zirlaibu a thlawnna sem a ni dawn tih a puang. Zirlaite tan hian scheme thar ‘Aarohan’ duan a ni a, he scheme hnuai-ah hian mithiam leh challangte mentor atan ruat an ni dawn a, anni hian zirlai pathum vel ṭheuh an kaihhruai dawn a ni, a ti. Computer zirna kalpui mek chu upper primary school 297 leh SEBA-affiliated school 50-ah hawn belh a nih tur thu a sawi bakah, Assam Public Expenditure Accountability Act chu a taka hman thuai a nih tur thu a sawi bawk. State sorkar chuan kum nga chhungin sub-treasury thar 25 a din tur thu Sarma chuan sawiin, heng hmunah te hian CCTV dah vek a ni dawn a ni, a ti. Heng bakah hian inkalpawhna ṭha siam a nih theih nana PWD kuta vaibelchhe 300 dah ṭhin chu vaibelchhe 600-ah tihpun a nih thu a sawi bawk.

State sorkar chuan tunah hian district 21-ah polytechnic hawng turin rua-hmanna a siam mek a, University dang pathum hawn belh tum a nih bakah, University awmsa tichangtlung tura hmalak a ni. Karimganj, Dhubri leh Golaghat-ah te Engineering College din a ni dawn bawk. Finance Minister chuan Gauhati University-ah South Asian Study Centre hawn a nih tur thu puangin, kum thum chhunga Srimanta Sankardev University tihchangtlunna turin nuai 1,000 rua-hman a ni a ti a, India rama University
ṭha ber te zinga mi ni thei tura beisei a nih thu a sawi. Assam sorkar hian zirtirtu 12,000 lakbelh a lo remti tawh a, nakum April khian zirtirtu hi 5,000 vel lakbelh leh a la tum bawk a ni.

Finance Minister chuan Health Sector lama hmalakna atan health insurance scheme ‘Atal Amrit Abhiyan’ chu kalpui a ni dawn tih sawiin, mi pakhatin kum khat chhungin cheng nuai hnih thleng a bill thei dawn a, BLP chungkua te chu a thlawna tihsak an nih tur thu a sawi. Cancer hospital-ah khum 200 dah belh tura hmalak a nih tur thu sawiin, Guwahati Medical College and Hospital bakah sorkar medical college Jorhat, Silchar, Tezpur leh Barpeta-ah te cancer wing din a nih tur thu a sawi bawk. Kum 2016-17 chhung hian Nagaon, Dhubri leh North Lakhimpur-ah te medical college din tura tih a ni a, hemi atan hian cheng vaibelchhe 200 ruahman a ni. Heng bakah hian State plan sum hmangin Diphu-ah medical college din a nih tur thu Minister chuan a sawi bawk. State sorkar chuan sorkar doctor pension kum chu 65-ah a pawhsei sak dawn bawk a ni. Sarma chuan state-in a mamawh em em, All India Institute of Ayurveda chu Raha-ah din tur rua-hman a ni a ti a, Ayurveda hospital pawh Majuli leh Dudhnoi-ah te din thuai a ni dawn a ni, a ti.

Sorkar chuan state sorkar hnuaia thawk Grade III & IV te tan housing loan cheng nuai 15 thleng pek theih turin rua-hmanna a siam a, higher education loan pawh pe chhuak turin hma a la dawn a ni. Heng zawng zawng bakah hian hmun ṭhenkhat New Delhi, Bangaluru, Vellore, Chennai leh Kolkata, Shillong leh Mumbai-a Assam House te tih changtlun a nih tur thu sorkar chuan a tarlang bawk.