UGC-in University-ah NER history zir rawt

University Grants Commission (UGC) chuan ram chhunga University hrang hrangah Northeas-tern Region (NER) history chu Undergraduate (UG) leh Postgraduate (PG) level-ah zir a nih theih nan rawtna a siam.

Lok Sabha-a zawhna chhannaah, Minister of State for Human Re-source Development Dr Mahendra Nath Pan-dey chuan ram chhunga University-te chu NER history, literature leh culture te zirtir tura thurawn pek an ni, a ti. Student exchange programme chuan India rama hnam hrang hrangte culture leh history hriatna kawngah nasa takin zirlaite a pui thei tih sawiin, a bikin NER chanchin hriatna kawngah a ṭangkai hle a ni, a ti. Zirna in sangah cultural exchange programme kalpui ni thei se a duh thu a sawi bawk.

UGC chuan NER-a hnam hrang hrang ten zalenna an sual dan te, an mi hrat khawkheng freedom-fighter te chanchin chu University thleng pawha zir tham tak a nih tur thu sawiin, National Council for Education Research and Training (NCERT) pawhin NER chanchin ngaihnawm tak tak te chu zirlaibu-ah a telh tawh niin minister chuan a sawi a ni. Heng bakah hian ‘Ishaan Uday’ scheme hnuaiah zirlai 10,000 te chuan scholarship an dawng ṭhin a ni, a ti.

Dr Mahendra Nath Pandey chuan NER-a zirlaite tan ram chhunga zirna hmun hrang hrang-ah engineering, tech-no-logy, architecture leh pharmacy course-ah te seat hauh sak an nih thu a sawi a, All India Council for Technical Education (AICTE) chuan hmarchhak tan scheme 'North East Quality Improvement Programme' (NEQIP) kalpuiin, hei hi hmarchhak zirlaiten zirna ṭha zawk an neih theih nana duan a nih thu minister chuan a sawi bawk.