Hmarchhak railway tihhmasawn nan vaibelchhe 7000

Railway ministry chuan sorkar kum kal mek 2016-17 chhunga hmarchhak state ten railway lama hma an sawn theih nan vaibelchhe 7,000 a invest tur thu Railway Minister Suresh Prabhu chuan a sawi.

Prabhu chuan kum 2014-15 chhung khan railway ministry chuan hmarchhakah hian sum vaibelchhe 2,702 a lo invest tawh a, nasa zawka hmasawnna kalpui a nih theih nan vaibelchhe 7,000 invest turin ruahmanna hi siam a nih thu a sawi. Prabhu hian tunhnai khan Agartala-Delhi passenger train service chu a vai liam a, he hun hi Bangladesh Railway Minister Mazibul Hoque, Tripura Governor Tathagata Roy, Tripura Chief Minister Manik Sarkar, Minister of State for Railways Rajen Gohain leh India leh Bangladesh aṭang tein mi pawimawh eng emaw zatin an hmanpui a ni.

Prime Minister Narendra Modi chuan hmarchhak hmasawnna chu a ngaihpawimawh thu minister chuan sawiin, hmasawnna rualkhai taka kalpui chu a thupui a ni, a ti. Hmasawnna tak tak awm tur chuan inkalpawhna chu thil pawimawh hmasa ber a ni a ti. Railway minister chuan tourism chu hmarchhak hmasawn nana thil pawimawh tak a ni, a ti bawk.

Bangladesh Railway Minister Mazibul Hoque chuan an Prime Minister Sheikh Hasina chuan India nena railway hmanga inthlunzawm chu a suangtuah leh a beisei a nih ṭhin thu a sawi. India leh Bangla-desh te chuan kawng hrang hranga inzawmna ṭha an neih a ngai a, mipuite rilruah pawh chu chuan hmun a chang tur a ni, a ti. Sumdawnna mai piah lamah culture thlenga inhriatpui tawn a ngai a, chu chuan kawng tam takah rah ṭha a chhuah dawn a ni tiin, helte chetna do let kawngah ram pahnihte chu an ṭanrual a ngaih thu Hoque chuan a sawi.

Minister Suresh Prabhu hian Thawhṭanni khan Dimapur (Dhansiri)-Zubza railway line project kalpui tur lungphum chu Dima-pur Railway Station-ah a phum leh nghal a, Nagaland gover-nor, P.B. Acharya leh chief minister bakah sorkar mi pawimawh ten an ṭawiawm a ni.