Assam: Congress in by-election-a candidate tur te puang

All India Congress Committee (AICC) chuan Assam by-election, November 13, 2024-a a neih tur atana an party candidate an puang fel ve leh ta.

By-election hi constituency panga- Dholai (SC), Sidli (ST), Bongaigoan, Behali leh Samaguri ah te neih a ni dawn a ni.

Dhrubajyoti Purakayastha chu Dholai-ah a ding dawn a, Sanjib Warle chu Sidli ah, Bongaigoan-ah Brajenjit Sinha dingin, Congress hruaitu fapa Rakibul Hussain chu Samaguri ah a ding thung ang.

Congress hian Behali seat hi an thawhpui, united oppossition alliance-a tel, CPI (ML) tan an dah thung. Hetih lai hian tualchhunga Congress hruaituten hei hi duh loin, anmahni party ami ngei ding turin an duh. Hei vang hian party hruaitute chuan central lama ah hotute biain thutlukna an la siam leh dawn a ni.

BJP chuan by-election neih tur atan an candidate pathum, Nihar Ranjan Das (Dholai), Diganta Ghatowar (Behali), leh Diplu Ranjan Sarma (Samaguri) te an lo puang tawh a ni. Bongaigoan leh Sidli ah hian BJP thawhpui AGP leh UPPL aṭangin an ding dawn a, an hming erawh an la puang lo.