Nagaland: Ruihhlo tawlh leh lirthei ruknaa inhnamhnawih mi pariat man

Dimapur Police-te chuan Pathainni khan state ramri kaltlanga ruihhlo tawlh leh lirthei ruknaa inhnamhnawih mi pariat an man. An mi mante hi Assam, Manipur leh West Bengal amite an ni.

Hemi chungchangah hian Dimapur police chuan thuchhuah siamin, mi bo pakhat chungchanga FIR thehluh an chhuizuina aṭangin inter-state a chetla ṭhin gang an awm tih hi hriatchhuah a nih thu a sawi. Nagaland, Assam, Manipur leh West Bengal ah te heng misual rual zawn beihpui hi an thlak a ni.

Gang hian inter-state a lirthei sumdawnna atana hman ṭhinte chu bepawpin, driver ten an rin ngam hnuah hian ruihhlo hmangin an hrai rui a, nikhaw hreloa an awm chhungin an lirthei hi an ruksak ta ṭhin a ni. He suahsualnaa a bultumtu ber chu Shymalendu Roy, West Bengal mi a nih thu police-te chuan an sawi.

Technical surveillance-a finfiahna an hmuh aṭangin Manipur aṭang hian gang member pahnih, Assam aṭangin pali leh Dimapur aṭangin pahnih te an man ta a ni. Sumdawnna lirthei khalh leh neitute chu lirthei emaw a khalhtu bo an awm chuan police ah thlen vat ṭhin turin an chah nghal bawk.