Akhil Gogoi-a'n Tualṭo party-te ṭangrual turin ngen

Assam activist, Akhil Gogoi chuan kum 2021-a Assam Legislative Assembly inthlan neih turah rorellai BJP party chu paihthlak an nih ngei nan tualṭo party hrang hrangte chu ṭangrual turin a ngen. 

Gogoi chuan, "Assam mipuite chu kan inlungrual loh chuan, Assam tawpna a thleng dawn  a ni", tiin regional party tam tak din chu a ṭul lo tih sawiin, tualṭo party pakhat, lungrual taka an awmkhawmnna tur leh thiltithei tak an mamawh tih a sawi. An inlungrual loh chuan an state-ah Hindu-Muslim politics chu kum tam tak chhung an la buapui zel dawn a, hei hi Assam chhiatna tur a ni dawn a ni, a ti. 

BJP sorkarin  a pass tak, Citizenship Amendment Act (CAA) duh lohna lantirtu langsar tak, Gogoi chuan state chhunga pawl hrang hrangte pawh inlung­rual turin a ngen. "AASU, AJYCP, KMSS leh regional politics leh organisation zawng zawngte inthurual turin ka ngen a ni. An ṭanrual chuan BJP-RSS bakah Congress-AIUDF hi an hneh thei ngei dawn a ni," tiin a sawi. 

Akhil Gogoi chuan hripui leng vanga hun rei tak lockdown puan avangin chhungkaw tam tak hna thawk thei loin an awm a, hei vang hian sorkar chu chhungkaw tin hnenah Rs 10,000 pe turin a phut bawk. 

AASU leh AJYCP hian poli­tical party an din tur thu an lo puang tawh a, nakkum inthlanah pawh an party hming hian seat 80-100 vel chuh an tum tih an sawi. KMSS pawhin political party an din dawn tih sawiin, an party hming hi Akhil Gogoi-a'n jail aṭanga a chhuah hunah a puang dawn niin an tarlang. .

Nikum CAA duh lohna lantir­naa buaina chhuak kaihhnawihah Akhil Gogoi hi man niin, jail-ah a la tang a ni. Assam police-te chuan a thubuai hi National Inves­tigation Agency (NIA) kutah hlanin, NIA court chuan bail-a chhuah a dilna a lo hnawlsak tawh a ni.