Meghalaya: SSA zirtirtuten nawrh ti tawp

All Meghalaya SSA School Teachers Association (AMSSASTA) chuan Thawhṭanni khan ni 21 chhung sit-in-demonstration an neih tawh chu state sorkarin SSA zirtirtute hlawh tih pun a nih tur thu a sawi tak avangin an ti tawp. October 23 a kawngzawh an tum pawh an ṭhulh nghal bawk.

AMSSASTA president Peter Thyrniang chuan cabinet minister Ampareen Lyngdoh leh education department official te nen main secretariat-a meeting an neih zawhah, nawrh an tih tawp thu hi a puang a ni. Thyrniang chuan state sorkarin an hlawh pun chungchanga an thil phutte tihhlawhtlinsak a tiam avangin an lungawilohna an lantir mek chu an ti tawp tih a sawi.

Sorkarin an thil phut tih hlawhtlin tiam mah se, model code of conduct (MCC) hman mek a nih avangin sorkar hian an hlawh a tih punna tur zat hi a la puang thei lo a, engtikah hunah tak nge hman ṭan anih dawn tih chu an la puang theilo a ni.

Thyrniang chuan an pawl chuan an hlawh chu 100% a pun an duh thu sawiin, an hlawh pun hnuhnung ber hi kum 2016 daih a nih tawh thu a sawi bawk.Lower primary zirtirtu tehian Rs 19,044 an hlawh a, upper primary zirtirtu te hian Rs 20,493 an hlawh mek bawk.