Gadkari-a'n Shillong bypass a hawng

Union Minister of Road Transport & Highways and Shipping Nitin Gadkari chuan Ningani khan Arunachal Pradesh, Jairampur-a kawngpui project kalpui tur lung a phum hnuah, nimin khan Shillong pumpelhna kawngpui leh Umiam-Jorabat inkara four-lane kawngpui a hawng.

Ni li cham tura hmarchhak bial tlawhtu Union Minister Nitin Gadkari chuan Shillong bypass hi hman theiha peihfel a nih aṭangin kum hnih hnuah a hawng chauh a ni.

Umiam-Jorabat inkara four-lane kawngpui hian Mizoram leh Tripura kalna kawngpui, NH-40 leh NH-44 a pawh a ni.

Gadkari chuan hmarchhak state pariata Chief Minister, PWD Minister leh Chief Secretary te chu vawiin hian meeting a neihpui nghal ang.

Hetihlai hian Gadkari chuan Jairampur-a lung a phum zawh hnuah Ningani khan chanchinthar thehdarhtute kawmin, hmarchhak biala helpawlte chu tharum thawhna bansan a, nunphung pangngaia nung turin a sawm.

"Sorkar laipui chu kawng engkima hmarchhak bial hmasawn nan a inhawng reng a, hei vang hian hmarchhak state te tan National Highways and Infrastructure De­velopment Corporation Limited (NHIDCL) pawh a din a ni, a ti.

National Highway Authority (NHA)-in hmarchhak biala road project a lo kalpui tawhte chu NHIDCL hian a kalpui vek dawn a, Border Roads Oraganisation project ṭhenkhat pawh hlanchhawn a ni ang.

NHIDCL head office hi Guwahati-ah hawn a ni dawn a, hmarchhak state tinah branch office hawn a ni bawk ang.

Gadkari chuan hmarchhak biala contrac­tor te'n kawngpui project te ṭha taka an thawh theih nan zirtirna hun buatsaihsak an nih tur thu a sawi a, kawngpui project kalpui tur chu tualchhung contractor te'n an thawh theih nan cheng vaibelchhe 50 hu-a contract ruahman a nih tur thu a sawi bawk.

"Kawngpui project ṭha taka kalpui a nih theih nan tualchhung contractor te training pek an ni ang a, project kalpuina atan Union Road Ministry chuan state sorkar chu detailed project report buatsaih kawngah a ṭul angin a puih bawk ang," a ti.

Hmarchhak biala national highway te enkawlna senso sang lutuk tihtlemna atana cement concrete road-a siam vek tura ruahman a nih thu sawiin Gadkari chuan hemi atan hian cement company te hnenah man tlawm zawkin cement tonne nuai 95 a hauhlawk tawh tih a sawi.

Kawngpui sira vantlang mamawh siamna atan state sorkar te chu rawtna siam turin Gad­kari chuan a ngen bawk a, hei hian tual­chhung mite hna a siam dawn a ni, a ti.