NPF MLA te inhmuh thiam lohna a tawp

Nagaland Peoples Front (NPF) party chhung buaina avanga thla thum chuang zet party MLA te inkara inhmuhthiam lohna a thlen hnuin Ningani khan NPF General Convention-ah inremna an siam.

Party chhunga buaina vangin Chief Minister TR Zeliang-a laka lungawi lo NPF MLA 22 chuan Chief Minister paihthlak tumin G Kaito Aye chu Legislature party hotuah an thlang a, party president-ah Noke Wangnao an thlang bawk. Chief Minister Zeliang-a kaihhruai sorkar chu February 5 khan fiah a ni a, member 60 awmna assembly-ah speaker tel loin vote 59 a hmu a, a laka NPF MLA helte pawhin an vote leh vek a ni.

Noke Wangnao-a pawlte hian party neitu nihna chuhin Election Commission-ah an zual ko a, mahse EC chuan party chhunga chingfel turin thutlukna a lo siam­sak hnuah General Convention hi neih a ni.

Ningania conventioan-ah hian party president Dr. Shurhozelie leh Noke Wangnao te chu mipui pungkhawmte hmaah an inchibai a, party chhunga buainate chu mipuite duh­dan anga a nem zawnga chinfel vek an tum thu an puang.

NPF convention thu­chhuak chuan NPF poli­tical leh legislature party chhungah inremna leh thawh hona ṭha a awm thu tarlangin, party tihphel tuma hmalakna chu an dodal zel tur thu a tarlang.