State inbuatsaihna a tawk lo: Chief Minister Gogoi

Chief Minister Tarun Gogoi chuan chhiat­rupna thlen thulha chhawmdawl leh chhanchhuah hna thawhna atana Assam inbuat­saihna chu a ṭhat tawk loh thu leh, hmabak tam tak an la neih thu a sawi.

Gogoi chuan, "Tun dinhmunah chuan India ram state dangte ang bawkin disaster management-ah thiamna leh ṭhil tulte kan tlachham hle a, mahse India ramah kan chhe ber lo," a ti.

Nepal-a lirnghing hian Assam pawh a sâwi pha a, chhiatna liam tham tak a thleng tih kan hriat hnuah state sorkar pawhin a bungraw neihte chhawpchhuakin a inbuatsaih nghal a ni, a ti.

Assam Chief Minis­ter hian lirnghing tuarte chhawmdawl nan Assam-a MP te leh MLA te chu an thla khat hlawh ṭheuh thawh turin a ngen bawk.

Gogoi chuan an hriat theih chinah lirnghing lai khan Nepal-ah Assam mi 152 an awm thu a sawi a, heng zinga mi 126 chu him takin Assam-ah an kir tawh a ni.

"Mi paruk thite ruang pawh Assam thlenpui an ni tawh a, mi 18 chuan Nepal-a la awm an thlang a ni," a ti. Hetihlai hian lirnghinga hliam tuar mi pali te chu damdawi-inah enkawl an la ni.

Assam mi pahnih chin hriat loha awmte chanchin chungchang sawiin Gogoi chuan an chin­chang hriat a la nih loh thu leh an awmna chin hriat tuma zawn mek an ni, a ti.

Hetihlai hian lir­nghing avanga Assam-a building ṭhenkhat khi chu mithiamte'n a hlauhawm loha an hriat thu Chief Minister Gogoi chuan a sawi bawk.