Assam Congress MLA Siddique an man

Assam Congress MLA Siddique Ahmed chu kum 2011-a mi kutthlak thubuai a neih kaihhnawihah court zahlohna thubuai siamsak niin, Thawhlehni khan man a ni.

MLA Siddique lakah hian kum 2011 khan Rezaul Karim chuan Nilambazar Police Station-ah FIR a thehlut a, Indian Penal Code (IPC) section 323, 325, 341/34 tlawhchhana thubuai siamsak a ni.

South Karimganj Additional Chief Judicial Magistrate S S A Rahman chuan January 9, 2015 khan Siddeque hi court-a inlan turin a lo hriattir tawh a, mahse a inlan loh avangin vawi hnih a hun sawn a nih hnuah April 30 khan a inlan a, a hmaa thubuai a lo awrh tawh bakah court zahlohna thubuai siamsak niin, man nghal a ni.

Additional Chief Judicial Magistrate chuan Siddeque-a bail dilna hi a hnawlsak nghal a, May 6 thleng judicial custody-a awm turin a chungthu a relsak.

MLA Siddeque hi thla khat chhunga Congress MLA thubuai neih avanga man pahnihna a ni a, Assam police te chuan April 14 khan MLA Rumi Nath chu lirthei ruk hmang thawhpuia puh a nihna thubuaiah an lo man tawh bawk.

Karimganj South bial aṭanga MLA-a thlantlin Siddeque hi Chief Minister Tarun Gogoi-a ministry-ah hian Minister for Border Affairs and Cooperation hna chanpual pek a ni a, mahse nikuma MLA ṭhenkhat Chief Minister laka helte zingah khan telin, July thla khan minister a nihna aṭangin ban a ni.