Arunachal hi India ram bung khat ṭhenhran theih loh a ni : VK Singh

Union Minister of State for External Affairs VK Singh chuan Arunachal Pradesh chu India ram bung khat, ṭhenhran theih loh a nih thu tarlangin, he thu hi sorkar laipuiin vawi eng emaw zat China a hriattir tawh a ni, a ti.

Union Minister Singh chuan Rajya Sabha inkhawma zawhna a chhannaah he thu hi a sawi a, India leh China chuan ramri-ah remna leh muanna a awm theih nan hmalak an lo remti tawh thu a sawi.

"China chuan ramria India ram chu a ramah chhalin min chuhpui a, Arunachal Pradesh chhuahlama square kilometre 90,000-a zau chu a ram tiin a chhal a ni," a ti.

Singh chuan, "Arunachal Pradesh chu India ram a ni, tiin high level-ah pawh China chu vawi eng emaw zat kan hriattir tawh a ni," a ti a, ram pahnihte chuan inhmuhthiam lohnate chu inbiakna leh a muanawm zawnga chinfel kan duh a ni, a ti.

Tun hnaia China sipaite'n Jammu & Kashmir, Ladakh ram an luh chungchang chu China ram thuneitute thlen a ni em tih zawhna chu Singh chuan chhangin China leh India ramri-ah Line of Actual Control (LAC) tia chiang taka pawm tur a awm lo a, mahse sorkar laipui chuan hetiang thil thleng hi ruahmanna felfai tak siamin China a hriattir ṭhin a ni, a ti.

"LAC hi ram pahnihte pawm tlan theiha chiang taka chhinchhiah ni se ram pahnihte inkara boruak muanawm lo thleng ṭhin hian a ziaawm phah ngei ang," tiin Union Minister Singh chuan a sawi.

China Silk Road project chu India rama Spice Route leh Mausam Projects kalpui tur nen thlunzawm tumna a awm em tia zawhna lut chu Singh chuan India project pahnihte hi rampawn mite project nen thlunzawm tumna a la awm loh thu a sawi.