Kawngpui siam nan sorkar laipuiin vbc 20,000 seng dawn

Union Road Tran­sport and Highways Minister Nitin Gadkari chuan kar kalta Inrinni khan hmarchhak biala inkalpawhna kawngpui siamṭhat nan kum kal mekah sorkar laipuiin cheng vaibelchhe 20,000 a thawh tur thu a sawi.

Gadkari chuan hmar­chhak state pariata Chief Minister, PWD Minister leh Chief Secretary te chu Inrinni khan Guwahati-ah meeting a neihpui a, Assam chuan kawngpui siamna project cheng vaibelchhe 8,000 hû a chan tur thu leh Arunachal Pradesh-in cheng vaibelchhe 6,000 hû a chan tur thu a sawi bawk a, Nagaland leh Meghalaya-in cheng vaibelchhe 2,000 ve ve an chang bawk ang.

Union Road Transport Minister chuan National Highways and Infrastructure Development Corporation (NHIDC) office building sakna tur lung a phum bawk.

Kawngpui project kalpuina atana mimal ram laksak chungchang leh forest land clearance bawhzui turin state sorkar te an hriattir tawh thu Gadkari chuan a sawi bawk a, chinfel thuai a nih chuan a rang lama project kalpui theih a nih tur thu a sawi.

Kawngpui project te chu tualchhung contractor te'n an thawh theih nan tê zawka ṭhendarh a nih tur thu leh tualchhung mite'n an hlawkpui tur thu a sawi a, kawngpui an siamte enkawl zui tura state sorkar te an rawt thu a sawi bawk.

Gadkari chuan hmarchhak tlangramah alkatra-a siam kawngpui chu hluihlawn an tum thu sawiin, a aiah concrete cement-a siam hman uar an tum thu a sawi a, hemi atan hian cement company te hnenah man tlawm zawkin cement tonne nuai 95 a hauhlawk tawh tih a sawi.

"Kum hnih chhunga kan target chu nitin kilometre 30-a thui kawngpui siam a ni a, mahse hemi atan hian mipuite pawhin an tihtur leh mawhphurhnate an hlenchhuah ve a ṭul a ni. Kuthnathawkte pawh kawngpui sira thingphun tur leh a enkawl zui turin kan chhawr dawn a ni," a ti.

Union Minister Gad­kari chuan Prime Minister Narendra Modi-a'n hmar­chhak biala road infrastructure tihchangtlun chu a ngaihpawimawh thu sawiin, kawngpui sialna atana harsatna awmte chu a rang lama chingfel thuai tura hmarchhak state sorkar thuneitute a hriattir thu a sawi bawk.

Border Roads Organization (BRO) te'n hun tiam ruala kawngpui project an peihfel hman loh chungchangah BRO te chuan kawngpui kilometre 1,000-a thui an enkawl mek tih sawiin, BRO te'n hna an thawh theih lohna hmunah company dang rawih an tum thu a sawi bawk.

"Imphal-Jiribam inkar kawngpui chu a chhia tih ka hria a, hei vang hian BRO te aiin National Highways Authority of India te chu detailed project report (DPR) buatsaih turin ka hriattir ta zawk a ni," a ti.