NE state khawpuite sorkar lai-puiin smart city-ah siam a tum

BJP kaihhruai sor­kar laipui chuan a flag­ship programme hnuai­ah hmarchhak state khawpui- Agartala, Shillong, Aizawl, Imphal, Kohima, Itanagar leh Gangtok te smart city-a siam a tum thu a tarlang.

Union Cabinet chuan kar kalta khan India rama khawpui 100 smart city-a siamna tur a pawm a ni. Smart city-a siam tur hi mi maktaduai khat aia chenna khawpui aṭanga thlan tur ni mah se state tê zawkte tan pawh ngaihhnathiamna siam a ni bawk.

Urban development ministry (UD) official chuan hmarchhak state capital te chu an state-a khawpui lian ber vek an nih avangin smart city-a siam tura thlan vek theih tura ruahmanna siam a ni, a ti.

Khawpui chhunga mihring chen tam lam aṭanga teh a nih dawn chuan Delhi, Srinagar, Goa, Shimla, Dehradun, Puducherry, Ranchi, Kavaratti, Chandigarh, Silvassa leh Port Blair te smart city tura thlan theih an ni dawn a, mahse final list-a lang pha tur chuan ‘city challenge competition’ an paltlang a ṭul dawn a ni.

Sorkar laipui chuan smart city-a a thlan­chhuahte chu khawpui tihchangtlun nan kum nga chhung cheng vaibelchhe 48,000 a pe ang a, kumtinin khawpui pakhatin cheng vaibelchhe 100 zel an dawng ang.

Smart city-a khawpui siam turah hian kum 2015-16 chhungin khawpui 20 thlanchhuah an ni phawt a, kum 2016-17 ah khawpui 40 leh kum 2017-18 ah khawpui 18 thlanchhuah a ni leh ang.

Smart city te chu mi­hringte nitin mamawh infrastructure - tui leh power supply ṭha, sanita­tion leh solid waste management changtlung, public transport chang­tlung leh IT connec­tivity changtlung, e-governance changtlung bakah khua leh tuite venhimna chang­tlung tak siamsak an ni ang a, technology leh tun lai thiamna sang tak hmangin khawpui boruak fai leh khaw thianghlima siam a ni ang.