Tripura-ah TTAADC inthlanna nei

Member 30 awmna Tripura Tribal Areas Autonomous District Council (TTAADC) inthlanna chu nimin khan neih a ni a, Bangladesh ramri-ah Border Security Force (BSF) te'n khauh taka venhimna kalpuiin, buaina lian tham a chhuah hriat a ni lo.

Member 30 zinga 28 chu mipuite'n an thlang a, pahnih erawh nominate an ni a, seat 27 chu tribal te tan hauh a ni.

State Election Commissioner Sanjay Kumar Rakesh chuan nimina inthlanna neihah hian candidate 175 an awm thu sawiin, voters 758,554 an awm thu leh heng zinga voter 375,117 chu hmeichhia an nih thu a sawi.

Party lian- Communist Party of India-Marxist (CPI-M), Communist Party of India (CPI), Congress, Bharatiya Janata Party (BJP) leh Trinamool Congress bakah tualṭo party eng emaw zatin candidate an thehchhuak.

State Election Commissioner Rakesh chuan a vawi khatna atan inthlanah hian EVM (electronic voting machine) hman a ni, a ti.

Kum 1982-a din a nih aṭangin TTAADC-ah hian term hnih chauh party dangin sorkar an siam a, a bak zawng chu CPI-M kaihhruai Left Front an sorkar a ni.

Kum 1990-1995 chhung khan Congress leh Tripura Upajati Juba Samity (TUJS) ṭangrualin sorkar an siam a, kum 2000-2005 khan Indigenous People’s Front of Tripura (IPFT)-in sorkarna an chang bawk.

TTAADC hi India danpui, Seventh Schedule tlawhchhana din a ni a, mahse kum 1984, August thla kha Sixth Schedule amend niin, tribal te'n an culture leh an khawtlang nunte an humhalh theih nan thuneihna sang zawk pek an ni.

Tripura-a mihring nuai 37 aṭangin hmun thuma a ṭhena hmun khat hi tribal an ni a, TTAADC huam chhung hi sq km 10,491.69-a zau niin, state zau zawng hmun thuma a ṭhena hmun hnih a awh.