Defence minister-in venhimna kalpui dan a enpui

Defence Minister Manohar Parrikar chuan kar kalta Inrinni khan Assam-a ram venhimna chungchang leh hel­pawlte laka beihpui thlak mek a enpui.

Parrikar hian hel­pawlte laka beihpui thlak mek, Rangiya-a Red Horns Division te chu a tlawh nghal a, Lower Assam-a India sipaite beihpui thlak dan chipchiar an lo hrilh a ni.

December, 2014-a National Democratic Front of Bodoland (NDFB-S) helte'n Adivasi mite an beihnaa, mi 80 chuangin an thih phah hnu khan security force te chuan helte lakah hian beihpui an thlak nghal a ni.

Defence Minister Parrikar chuan beihpui thlak mek kalpui dan chu lungawi thlak a tih thu sawiin, sipaite'n civil mite pawi khawih loh zawnga helte an bei thei chu lawmawm a tih thu a sawi bawk.

Indian Army te'n mi­puite hamṭhatna atana an lo kalpui ṭhin, 'Operation Sadbhavna' hnuaiah a ṭul chuan sum tam zawk thehchhuah a nih tur thu Parrikar chuan a sawi bawk.

Bodoland Territorial Area District (BTAD)-a Bodoland Territorial Council (BTC) inthlanna tun hnaia neih zawh taka tharum thawhna leh buaina lian tham chhuak loa inthlanna neih a ni chu lawmawm a tih thu a sawi bawk.

Defence Minister Parrikar hi Union Minis­ter of State for Home Kiren Rijiju-a'n a ṭawi­awm a, India army leh security force dangte'n helte laka beihpui an thlak dan chu lungawi thlak a tih thu a sawi bawk.

Hetihlai hian Parrikar chuan Arunachal Pradesh-a, China ramri, Tawang tlawh a tum erawh khaw chhiat avangin a ṭhulh.