Kum 2011 protocol-a Assam telh turin Gogoi-a'n a ngen
Chief Minister Tarun Gogoi chuan sorkar laipui leh Bangladesh sorkarin Indo-Bangladesh Boundary Agreement, 1974 hnuaia September 6, 2011-a protocol an lo ziah tawhah Assam telh turin Prime Minister Narendra Modi a ngen.
Chief Minister Gogoi chuan Prime Minister Modi hnena lehkha a thawnah Bangladesh nena sorkar laipuiin protocol an ziaha Assam chungchang tarlan an tum lo chunga Parliament-in a pawmpui tur chungchangah Assam sorkar an rawn loh thu a tarlang a,
"Protocol-ah Assam telh a nih loh chuan eng tin nge Assam mipuite kan humhalh theih ang? He kalphung hi state leh sorkar laipui thawh hona ṭha, 'cooperative federalism' i lo sawi fo tawh palzutna a ni," tiin Gogoi chuan Modi a hriattir.
Assam Chief Minister chuan protocol chu sorkar laipui leh Bangladesh sorkarin kum 1974-a remna thuthlung an lo ziah tawh zulzuia siam a ni tih a tarlang bawk a, protocol avangin India leh Bangladesh ramri, Radcliff Line aṭanga Assam lam, Karimganjdistrict-a Lathitilla-Dumabari leh Pallathal, Dhubri district-a Kalabari (Boroibari) hmuna ramri chu rin ṭhat a ni a, hei vang hian Lathitilla-a, Assam ram acre 714, Kalabari (Boroibari)-a acre 193.85 leh Pallathal-a acre74.55-a zau chu Bangladesh lak aṭangin India-in a hum phah a ni, a ti.
Prime Minister Modi chuan kum 2014, November thlaa Assam a tlawh ṭumin Indo-Bangladesh Boundary Agreement, 1974-a Protocol 2011 chu Assam-in a hlawkpui tur thu a lo sawi tawh a, mahse Assam-a tlawmngai pawl hrang hrangin Bangladesh lakah Assam ram an hloh thei dawn nia ngaiin nasa takin an dodal a, hei vang hian sorkar laipuia BJP sorkar chuan nakkuma Assam assembly inthlan tur thlirlawkin Assam hi protocol 2011 hian tun hnai khan telh lo a rel a ni.