Manipur: Kuki pawlin PM leh NHRC hnenah lehkha thawn

Kuki Organisation for Human Rights (KOHUR) chuan nikum aṭanga Manipur state-a hnam leh hnam inkara buaina chhuak chuan ziaawm lam a pan theihna atana inrawlh tura ngenin, prime minister Narendra Modi leh National Commission of Human Rights hnenah lehkha an thawn.

KOHUR chuan an lehkha thawnah hian Meitei hoin tribal ram chhuhsakna turin 'majoritarian mayhem' an kalpui thu an tarlang. "Tun ṭum hi a vawi khatna ni loin, a tawpna tur pawh a ni dawn lo. Tribal mite Constitutional Protection leh Human Rights hi vawi tam tak bawhchhiat leh palzut sak an ni tawh a ni, " an ti. Manipur-a buaina chhuak tawh hrang hrang report te pawh an tarlang tel bawk.

Kuki pawl hian NHRC chu Manipur state sorkar leh Meitei hnamten Kuki-Zo tribal nuaibo an tumna aṭanga venghim turin an ngen a ni. Manipur-ah hian nikum May aṭang khan buaina hi chhuak tawhin mi 200 chuangin nunna an chan tawh a ni.

Manipur Police ten KCP (PWG) mi leh sa 6 an man

Imphal East district-a Porompat area-ah Manipur police te chuan Thawhlehni khan Kangleipak Communist Party (People's War Group) mi leh sa paruk te chu dan phal loha pawisa tam tham tak an khawn avangin an man.

Police te hian an mi mante kut aṭang hian pawisa fai Rs nuai 3.89 leh lirthei pathum, car pakhat leh motorcycle pahnih bakah mobile phone tam tham tak an man tel. Heng bakah hian document leh an mimal thilte an man bawk.

Thuchhuah siamin police-te chuan an mi mante hian mimal sumdawnna, sorkar office leh mipui ah pawisa an khawn ṭhin tih an tarlang a, dan phal loha ralthuam zawrh ruknaah an inhnamhnawih nia sawi an ni bawk a ni.