Assam: Bihar-ah Assam mi naupang kumtling lo 10 chhanchhuak

Bihar-a mihring hmanga sumdawng ṭhinte kut aṭangin Assam minority and tribal communities zinga mi, hmeichhe naupang kumtling lo 10 te chu Bihar police-ten an chhanchhuak.

Bihar police-te hian pawl pahnih kut aṭangin naupangte hi an chhanchhuak a, orchestra group neitu mi panga te pawh man nghal an nih thu Superintendent of Police Saran, Dr. Kumar Ashish chuan a sawi. An mi man zingah hian Assam mi, Abdul Rahim Sheikh a tel.

Heng hmeichhe naupangte hi hlawh ṭha tak pek tiama hruai an ni a,mahse hrehawm takin hna an thawh luihtir zui a ni. Naupangte chhanchhuah hna hi Mission Mukti Foundation, Narayani Sewa Sansthan, Peace Rehabilitation Centre, Nepal Rescue and Relief Foundation, West Bengal leh Childline ten an thawk ho a ni.

Mission Mukti Foundation-a an director, Virender Kumar Singh chuan an mi chhanchhuahte hi nun nuam taka awm turin anmahni mantute hian an tiam a, mahse dinhmun hrehawm tak hnuaia hna thawh tir an ni, tiin an rilru leh taksa hriselna thlenga nasa taka a nghawng thu a sawi. Medical exam an neih zawh ah Child Welfare Committee kutah an hlan nghal ang.