Sikkim: Sorkarin glacial lake endik turin member 13 awmna pawl din

Sikkim sorkar chuan an state-a a glacial lui ṭhenkhat, khuarel chhiatna leh tuilian thlen theihna hmun, a bikin GLOF (glacial lake outburst flood) thlen theihna endika hma la turin member 13 awmna commission a din.

Commission hmingah hian "Sikkim Commission on Glacial Hazards" tih a ni a; Akhilesh Gupta, India sorkar hnuaia department of science and technology senior adviser hluiin a kaihruai a ni.

He commission hian Sikkim-a glacial lui ṭhenkhat dinhmun derthawng tak tak, chhiatna nasa tak thlen theihnate enthlithlaiin, inven kawnga hma lo lak lawk dan turte an ngaihtuah ang. Sikkim state pawn lama stakeholder te nen pawh thawhho an duh thu an sawi.

Commission dinna tumna nikum October thlaa Sikkim hmarlama South Lhonak lake-a GLOF a thlen hnua siam a nih thu thuneitute chuan an sawi. India-China ramri ah glacial lui hi 40 a awm a, North Sikkim-a lui 13 leh West Sikkim-a lui 3 te chu dinhmun derthawng zual an nih thu an sawi bawk.

Tun hnaiah sik leh sa inthlak danglam nasa chuan vur a ti tui nasa a, hei hian lui hran hran siamchhuakin Sikkim-ah hian chhiatna a thlen theih thu an thuchhuahah an tarlang. Commission hian a ṭul a nih chuan task force dah pawh an remti thei a ni. Report hi nakkum February-ah thehluh tura tih an ni.