Assam-a Bajrang Dal-in Biak-ina kal tum Hindu-te dan tum

Assam-a Cachar district-a Bajrang Dal general secretary Mithun Nath chuan Hindu zingah Krismas lawm pui tura Kristian biak-ina kal tum an awm chuan an dang dawn tih The Print chanchinbuin a kawmnaah a sawi. 

Hemi hma hian Nath hian Krismas-a biak-ina Hindu kal an awm chuan vuakah a lo vau tawh bawk. 

December 3-a Silchar-a Bajrang Dal working committee meeting-ah he thu hi sawiin, Nath chuan, "Krismas niah Hindu zinga biak-ina kal an awm chuan zirtirna pek an ni ngei ang," tiin Shillong-a temple khar a nih chungchang a sawichhuak. Hei vang hian Hindu-te chuan Krismas chu an lawm pui ve tur a ni lo, a ti. Khasi Students' Union (KSU) chuan Meghalaya khawpui, Shillong-a Rama­krishna Mission hnuaia mi, Vivekananda Centre an kharsak nia sawi a ni. 

Nath chuan a thusawi hi a sut dawn lo tih tar­langin, "Kristian sakhua leh Krismas lawmna chu ka dodal a ni lo. He thu ka sawina chhan chu Hindu-te chuan mahni inngaih­hlutna nei se ka duh vang zawk a ni," a ti. 

Cachar district adminis­tration chuan Nath thusawi chungchang hi chhui chiang turin Assam Police a ngen tawh a, Cachar deputy commissioner Keerthi Jalli chuan hma an lak thu leh, case pawh an ziahluh tawh thu a sawi.

Kum 39 mi Nath chuan, "Min man dawn pawh ni se ka hlau lo. Ka thusawiah hian ka chiang a ni. Hindu-te hian temple sakna turin mosque emaw, biak-in emaw kan tihchhiat sak ngai lo. Festival tih, Eid leh Krismas te pawh kan lawm pui zel a ni," a ti. Barak Valley-a sakhaw hrang hrang zuitute chuan sakhaw festival-te chu a huhoin hlim takin an lawm ṭhin tih a sawi. "Mahse thla thum liam ta aṭang khan Assam aṭanga kal kan Hindu unau leh non-Tribal-te chu Meghalaya-a misualten an tinawmnah fo a, dawrte kharsakin, kan temple-te an khar a, finfiahna pawh ka nei vek a ni. Cachar lamah Mizo-ten kan ram min chhuhsak bawk. Hetianga tuar reng tur kan ni bik em ni?" tiin, hei vang hian Krismas chu boycott a ṭul thu a sawi. 

Mi tam tak chuan intihlimna an zawng hrim hrim a, Krismas niah pawh Silchar-ah Kristian 10 vel lekin biak-in te an tlawh laiin, Hindu 200 dawn ten an tlawh ṭhin a ni, a ti.