ILP chungchang buaipui turin party tin MLA-te ngen

Meghalaya-a BJP MLA Sanbor Shullai chuan an state-a Inner Line Permit (ILP) system hman an phut chungchang chu party tin MLA-te chuan buaipui a, Delhi-a prime minister Narendra Modi leh home minister Amit Shah-te sawipui vek tura a duh thu a sawi. 

State chhunga pawl hrang hrangten ILP hman thuai phuta an nawr mek karah, BJP MLA chuan chief minister Conrad K Sangma chuan hemi chung chang sawipui tura sorkar laipui hotute hmu tura state aiawhte a hruai loh chuan, ama mimalin sorkar laipui chu sawipui mai a tum tih a sawi bawk. 

"Scheme hrang hrang zawngin Delhi hi kan kal ngawt tur a ni lo a, mahse state leilung fate thil phut leh duhzawng tipuitling tura nawr tura kan kal a ngai. Mipuiten an aiawh turin min thlang a, kan post-ah awm mai mai tur kan ni lo a, mipuite nghawng thei thilte hi kan bawhzui a ngai a ni," a ti. 

Sorkar laipui chuan hmarchhak state ṭhenkhat chu ILP system hman a phalsak tawh a, hei vang hian Meghalaya mipuite pawhin he system hmang tur hian dikna an nei ve a ni, tiin Shullai chuan a sawi. Hmarchhak state zingah Arunachal Pradesh, Mizoram, Nagaland leh Manipur-ah ILP system hi hman a ni.