AAPSU-in watertreaty siam turin sorkar LAIPUI A ngen

All Arunachal Pradesh Students' Union (AAPSU) chuan Chinese media-ten China sorkarin nakkumah Tibet-a Brahmaputra luiah major hydropower project siam a tum nia an tarlan chu ngaih­ven a ṭul thu an sawi. 

Zirlai pawl chuan sor­kar laipui hnenah hemi chung chang hi ngaihven zui a, hydro­power project siam a nih chuan Arunachal Pradesh state a nghawng dan turte ngaihtuah chungin, China chu water treaty siampui turin a ngen. 

AAPSU general secretary Tobom Dai chuan, "Siang/ Bha­maputra chungchang ringawt a ni lo tih kan hriat a ngai a, China aṭanga India ram lui rawn luang lut dangte ngaihtuah tel vek a ngai. Hei vang hian sorkar laipui chuan mipuite dinhmun tur ngaihtuahin, international forum lamah a kalpui a ngai a ni," a ti. 

Kum tam tak chhung chuan ramriah China hmalakna hrang hrang a awm fo a, hei hi AAPSU chuan state sorkar leh sorkar laipui hnenah pawh a lo thlen ngun tawh hle a ni, a ti. 

Kum 2018-a hetih laia union home minister Rajnath Singh leh North East Students Organisation (NESO)-ten joint meeting an neih ṭum pawh khan AAPSU chuan Siang River-ah China hma lak dan te sawi chhuakin, sorkar laipui chu China sorkar hnenah sawipui turin an lo ngen tawh tih Dai chuan a sawi. Mahse sorkar laipui chuan an ngenna siam ṭhin hi chhuanlam dang dang siamin a ngai pawimawh tawk ngai lo niin a sawi.