Manipur: Sorkar laipuiin in 7,000 sakna tur sanction

Manipur chief minister N Biren Singh chuan Nilaini khan sorkar laipuiin tualchhung buaina chhuah avanga chenna in chhuahsan te leh, chenna tur mumal nei lo te awmna tur in 7,000 sakna tur pek a remtih thu a sawi.

CM Secretariat-a chanchinthar lakhawmtute a kawmnaah, CM Singh chuan prime minister Narendra Modi, home minister Amit Shah leh hruaitu dangten an state dinhmun hriatpuia an ngaihsak avangin lawmthu a sawi. In hi sak a nih hunah chuan tuna an awm lailawkna, school hrang hrang leh college aṭangin an insawn chhuak thei tawh dawn a, in 2,000 dang pawh sak tura ruahman mek a nih thu a sawi bawk.

In 1,015 chu Bishnupur a sak tur a ni a, Churachandpur ah 1,331, Kaching ah 1,217 , Chandel ah 511, Kangpokpi ah 1,813, Imphal West ah 225 leh Imphal East ah in 594 sak a ni ang. Hei bakah hian road and transport minister, Nitin Gadkari chuan state chhunga highway sakna tur Rs vbc 1,000 pek a nih tur thu a lo sawi tawh a, tlangrama district headquarter kawng siamṭhatnan Rs vbc 175 pek a nih nghal tur chu a sawi. Ministry leh Manipur sorkar inbiakrem vat theih loh vanga national highway 28 siam tur tih khawtlai pawh an chhunzawm thei tawh dawn tih a sawi nghal bawk a ni.

CM Singh hian world-class football stadium tur, union minister Kiren Rijiju-a'n a remtihpui tawh sakna tura sum ngai zat tur Rs vbc 220 a ni tih a sawi a, home Ministry leh DGP te nen a sakna tur bungruate him taka lak luh dan tur an sawi ho thu a tarlang bawk.