Arunachal: Kameng Culture and Heritage Museum hawn a ni

Arunachal chief minister Pema Khandu chuan Nilaini khan Kameng Culture and Heritage Museum a hawng. He hun hi union minister Kamlesh Paswan leh general officer commanding, Gajraj Corps lieutenant general Gambhir Singh ten an hmanpui a ni.

Museum hi Nyukmadung, West Kameng district-a Tawang kalkawnga awm niin hnam ziarang chhawm nun zel nan leh socio-economic ṭhanlenna kawnga pui tura siam a ni. Indian Army hmalakna pakhat a nih bakah sorkar laipuiin vibrant village programme a kalpuina hnuaia mi a ni bawk.

Indian Army hmalaknaah hian tualchhung mipui leh state sorkarin nasa takin an thlawp a, Arunachal Pradesh hnam rohlu tam tak an dahkhawm a ni.

Chief Minister Khandu chuan Kalika Purana leh Mahabharata pawimawhna te sawichhuakin, Kameng Museum chu hmanlai thil vawnṭhat nan leh ṭhangthar lo awm zel turte tan a ṭangkai tur thu a sawi. Thil hlu tam tak an dah piah lamah hian cafetaria, naupang infiamna leh tourist facilitation centre leh medical emergency an dah tel bawk.

Hawnna hun hi mi 500 chuangin an chhim a, sorkar mi pawimawh, tualchhung mite leh Dirang Monastery Lamas, school naupang leh tourist te pawh an tel.