Sipai convoy lambunnaah Assam Rifle 8 an kaphlum

Nagaland, Mon district-a Assam Rifle convoy lambunaah Pathianni khan Naga helte'n Assam Rifle pariat an kaphlum a, mi parukin hliam an tawrh bakah chin hriat lohin pali an awm.

Mon district, Changlang Su hmunah Assam Rifle tui chawi motor pahnih chu lambun a ni a, helte chuan improvised explosive device (IED) bomb an tihpuah hnuah an kap zui nghal a ni.

Nagaland Director General of Police (DGP) L.L. Doungel chuan helte hian Assam Rifle pariat an kahhlum thu leh mi parukin hliam an tawrh thu a sawi a, mi pali chu chin hriat loha an awm thu a sawi bawk. Hliam tuar mi paruk zinga pahnih chu an dinhmun a ṭha lo hle.

Assam Rifle official chuan tui chawi motor pahnihah hian sipai 20 vel an chuan thu a sawi a, lambun hnuah helte dapchhuah beihpui thlak nghal a ni, a ti.

Assam Rifle official chuan convoy hi rocket propelled grenade (RPG) hmanga beih a nih thu sawiin, National Socialist Council of Nagaland-Khaplang (NSCN-K) te chu pawikhawihtu nia an rin thu a sawi bawk.

NSCN-K helte leh sorkar laipuiin inkahhai thuthlung an ziah chu tun hnai khan a hun tiam a tawp a, mahse helte hian thuthlung pawhsei an duh lo a ni.