NE helte hlauhthawnawm lo: Sorkar laipui

Hmarchhak biala helpawlte chu ṭangrual pawh ni se India ram himna atana a hlauhthawnawm loh thu sorkar laipui chuan a tarlang a, security agency te'n an dang thei a ni, a ti.

Ministry of Home Affairs (MHA) official chuan security agency te'n Myanmar rama inkulh, hmarchhak helpawlte chu an chettlatna leh an hmalakna an bawhzui reng tih sawiin, helpawlte chuan ṭangrual pawl din an tum thu a sawi.

Hmarchhak biala helpawl ṭangrual zingah hian SS Khaplang-a kaihhruai Nationalist Socialist Council of Nagaland (NSCN-K), United Liberation Front of Asom (ULFA-Independent), Songbijit-a kaihhruai National Democratic Front of Bodoland (NDFB-S) leh Manipur-a helpawl ṭhenkhat an tel.

MHA official chuan hel ṭang­rualte chu India ram himna atan hlauhthawnawm angin lang mah se an rilru lamah chauh chak tharna an neih tur thu leh tharum thawhna kawngah an chak phah loh tur thu a sawi.

Hmarchhak helpawl tam zawkte hi Myanmar rama, Taga chhehvelah an inkulh a, India security agency te chuan an chakna leh chak lohnate an hria a ni, tiin official chuan a sawi bawk a, hmarchhak helpawlte chuan a hmain ṭangrual pawl, Indo Burma Revolutionary Front an lo din tawh thu leh an hlawhchham thu a sawi.