Ram venhim nan Jorhat district thuneitute'n hma la

Jorhat district thuneitute chuan Assam-Nagaland ramri hnaiha Naga mite'n Tiru Hills Reserve Forest an luahsak ṭhin chu beihpui thlaka hnawhchhuah an tum.

Nagaland Mokokchung district-a ramri khaw mipuite'n Reserve Forest-a thlam an sakte chu kar kalta Inrinni aṭang khan an tihchhiatsak a ni.

Assam chuan Reserve Forest area hi Naga mite'n an ram nia chhalin an luahsak tiin an sawi a, hei hi Jorhat district, Rongkham leh Mariani khaw mipuite tan a him lo a ni, an ti. Hemi chungchangah hian MLA Rupjyoti Kurmi chuan Chief Minister Tarun Gogoi hnenah phalna nei loa forest reserve luahtute hnawhchhuah beihpui thlak turin vawi eng emaw zat a lo ngen tawh a, flag sen tarin Jorhat district-a Assam-Nagaland ramri chhin­chhiahna a lo siam tawh bawk.

Jorhat Deputy Commissioner (DC) Solanki Vishal Vasant chuan ram luahtu eng maw zat chu hnawhchhuah an nih tawh thu sawiin, police te leh forest department official te nen hnawhchhuah beihpui an thlak thu a sawi a, Reserve Forest chhehvelah boruak muanawm a awm tawh tih a sawi bawk.

Assam lamin an ram luahtu nia a puh Naga mite hi Naga helte'n an thawhpui niin Jorhat district, Rongkham khaw mipuite chuan an sawi a, Assam ram luahtute chu Mokokchung district thuneitute'n an thlawp bawk niin an sawi.

Hetihlai hian Jorhat district-a Assam-Nagaland ramri-ah boruak a ṭang hle a, buaina chhuak thei lakah security force te pawh inralring renga awm tura thu pek an ni.

Jorhat Superintendent of Police (SP) Amanjit Kaur chuan Nagaland lam, Mokokchung district-a security force te leh Jorhat district lama security force te chu a ṭul huna che chhuak nghal thei tura inbuatsaih tura an hriattir thu a sawi.

SP Amanjit Kaur chuan ramria mipuiite chuan tharuma inbeih tumin hma an lak thu a sawi a, hei vang hian special task force, police commando leh Assam police te chu Rong­kham khuaah dah an ni, an ti.