AFSPA hlih phûtnain United Nations a thleng

Naga Peoples Movement for Human Rights (NPMHR) chuan April 30 khan 'United Nations Permanent Forum on Indigenous Issues' session vawi 14-na United Nations hmunpui, New York-a neihah Armed Forces Special Powers Act (AFSPA) hlih an phût thu a tarlang.

NPMHR secretary general Neingolo Krome chuan session-a thu a sawiah AFSPA chuan sipaite chu thuneihna sang tak pein, security force te chuan hmarchhak bial leh Jammu & Kashmir-ah AFSPA tlawhchhanin an duh duh an kap thei a, phalna nei loin an duh duh an man thei a, chutianga titute chu dan hnuaiah venhim an ni, a ti.

"AFSPA tlawhchhana India sipaite'n Naga mipuite dikna chanvo nasa taka an palzutsak chungchangah NPMHR chuan kum 1982 khan Supreme

Court of India-ah AFSPA hlih phutin petition a thehlut a, kum 15 hnu, July 1997 khan hearing neih niin, mahse Supreme Court chuan AFSPA chu a ṭha tawk tiin keng tlang turin thutlukna a siam a ni," tiin Krome chuan a sawi.

State sorkar ṭhenkhat chuan AFSPA an ngaihmawh thu leh hlih an duh thu an tarlang tawh bawk tih NPMHR hotu chuan a sawi a, hmar­chhak biala AFSPA lekkawhna hmun a tlawh ṭumin UN Special Rapporteurs pawhin AFSPA hlih a lo rawt tawh thu leh hemi chungchang hi Special Rapporteurs chuan Permanent Forum session vawi 12-naah kum 2012, May thla khan nasa taka a lo tlangaupui tawh thu a sawi bawk.

Krome chuan AFSPA chungchang zirchiang turin sorkar laipuiin kum 2004 khan Jeevan Reddy Committee a din thu leh kum 2005-a report a thehluh thu a sawi a, committee chuan AFSPA chu hlih rawt mah se vawiin thlengin la lekkawh a ni, a ti.

NPMHR hotu chuan AFSPA hlih a nih theih nan UN Permanent Forum chu sorkar laipuiah bawhzuisak turin a ngen.