Arunachal-in China ramri-ah ALG hawn belh a duh
Arunachal Pradesh chuan China ramri-ah thlawhtheihna ṭum hmun, Advanced Landing Grounds (ALG) pahnih hawn belh a duh thu a tarlang a, ALG awm sate chu a ṭangkai thei anga hman a duh thu a tarlang bawk.
Arunachal leh China hian ramri kilometre 1080-a thui an inṭawm a ni.
Chief Minister Nabam Tuki leh Governor Lt Gen Nirbhay Sharma (Retd) chuan kar kalta Inrinnia Defence Minister Manohar Parrikar-a'n Arunachal Pradesh a tlawh ṭumin ALG hawn belh an duh thu hi an thlen a ni.
Tuki leh Sharma chuan China ramri, Line of Actual Control (LAC)-a duty sipaite chu ram venhim bakah mipuite hmasawnna atana tha thawh tura an duh thu Parrikar an hrilh bawk a, Arunachal-a ALG pariatte chu a ṭangkai thei ang bera chhawr an duh thu an sawi bawk.
Arunachal sorkar chuan ALG pahnih hi Kurung Kumey district, Koloriang leh Dibang Valley district, Anini hmunah hawnbelh a duh a ni.
"ALG te chu ram venhimna atan chauha hmang loin passenger leh bungraw lakluh nan bakah infrastructure changtlung tak siamna atan bungraw mamawh lakluhna atan a hman theih dawn a ni," tiin Governor Sharma chuan Defence Minister Parrikar a hrilh.
Ram vengimtu sipaite infrastructure hrang hrang- inbiak pawhna, health facilities leh thil dangte chu mipuite hman theiha buatsaih a duh thu Sharma chuan a sawi bawk.
Chief Minister Tuki chuan Parrikar hnenah hian memorandum point 10 a thehlut bawk a, heng zingah hian Scouts Units pahnih dinna tur, defence hnuaia hna laknaa Arunachal nula leh tlangvalte san zawngah ngaihhnathiamna siam, defence infrastructure vantlang mipui hman theiha ruahman, Army hospitals leh school din bakah Sainik school dinna atana 100% funding pek te a tel.