Manipur: Hmun hnihah inkahna thleng

Manipur-ah Inrinni zan khan hmun hnihah inkahna a thlen bakah, bomb a puak bawk niin official-ten an sawi.

Imphal West district police-te chuan Inrinni zan dar 7 vel bawra Koutruk Ching Leikai, Lamshang Police Station huamchhunga inbeihna chu Kuki helpawl thlen niin an ringhlel. Buaina chhuahna hmuna hian police-te hi kalin silaia inkahna a thleng zui a ni.

Koutruk Ching Leikai-a cheng pakhat chuan inkahna a thlen lai hian Bethel khua aṭangin Kuki helpawl hian drone an rawn chhuah bawk tiin a sawi. Tualchhung mite chuan September thla tir lam khan drone hmanga bomb an lo tuar tawh avangin an hlauthawng hle. CRPF chuan heng drone kap thla tur hian an inpeih reng thu an sawi.

Bishnupur dsitrict police-te chuan Kuki helpawl rinhlelhten Moirang Police Station aṭanga km 6 vela hla, Tronglaobi khua an bei niin an sawi bawk. Helte hian Inrinni zan dar 9: 15 velah Geljang leh Molshang-ah silai an hmet puak a, police leh khaw chhung mi volunteer-te chuan venhim hna an thawk nghal a ni. Kumin September 6 khan Tronglaobi khua hi Kuki helpawlte hian rocket hmangin an lo bei tawh bawk.

Ralthuam leh a kaihhnawih hmanrua man

Manipur-a Bishnupur leh Imphal West district-ah security force-ten ralthuam leh a kaihhnawih an man tih police ten an sawi.

Zirtawpni liam ta khan Uyungmakhong, Bishnupur district-a ralthuam an zawn naah 7.62 mm self-loading rifle leh a mu, grenade paruk, grenade arm ring pali, tear gas grenade pahnih, stinger grenade pathum leh IED kg 2.3 a rit te an man. Shantipur Makha Leikai, Imphal West district-ah pawh single barrel gun pakhat, 9mm pistol pahnih, 7.62 LMG mu leh M-67 hand grenade pathum bakah detonators pawh an man tel bawk.