Assam: Rohingya muslim zingah Assam ramri lutru an tam

Assam chief minister Himanta Biswa Sarma chuan Pathianni khan Dispur-a chanchin thar lakhawmtute a kawmnaah, an state-a Indo-Bangladesh ramri kaltanga Rohinyga Muslim lutru an tam thu a sawi.

CM Sarma chuan thla hnih liam ta chhung khan dan loa ramri kaltlanga Assam-a lut ru hi mi 130 chuang man niin, an zinga a tam ber chu Rohingya Muslim an ni, a ti.

Ramria security force-te harsatna an tawh ṭhin hrang hrangte chu CM hian sawiin, thla hnih liamta aṭang khan nitin Assam ramriah hian mimal emaw a huho ang emawa ramdang mi rawn luh ruk tum an awm reng thu a sawi. Border Security Force (BSF) ten venhim kawngah hian nasa takin hma la mah se India ramchhunga rawn lut thei tawk an la awm reng a ni, a ti. State thuneitute chu BSF thawhpuia ramri venhim kawnga hma la nasa lehzual turin a chah bawk.

Bangladesh tualchhung buaina thleng vanga sahimna zawnga ramri kaltlanga lut hi Hindu Bengali an nih an rin laiin,an data a lan dan chuan a tam ber chu Muslim Rohingya an nih thu Sarma chuan a sawi. Hindu Bengali an awm loh thu sawiin Rohingya Muslim te chu India rama state hrang hrang, Assam pawh tiamin, an luh ruk nasat thu a sawi bawk a ni.

Dan phal loha luhrukna hmun hluarna laiah hian Assam Police leh BSF te chu ṭangkawpin venhim hna an thawk mek. CM Sarma hian Bangladesh nena ramri inṭawm Tripura leh West Bengal ah te hian man an ngah tawh thu sawiin, Megalaya leh West Bengal-ah pawh BSF nen thawhhona tha tak neih a hma lak zui zel a pawimawh thu a sawi.

CM Sarma chuan dan phalloha Bangladesh aṭanga India ramchhung rawn lut emaw luh tum te chu man a thawnlet leh zel annih tur a sawi a, BSF te hmalakna hian mipuiten an thlawp ṭhat a mamawh takzet thu a sawi bawk a ni.