Meghalaya: KSU in rail network tih tawp phut

Khasi Students Union (KSU) chuan Meghalaya sorkar leh Megalaya Tourism Development Forum (MTDF) chu High-Speed Luxury Rail Network (HSLRN) dah tura ruahmanna an siam chu sut turin an phut.

KSU general secretary Donald V Thabah chuan rail network an duhloh chhan sawifiahin, ramdang mi rawn luh huk bakah dan phal loha state chhunga pem lut a tih tam dawn thu an sawi.

Rail network ai chuan state sorkar chu zirna, healthcare, langtlang taka hna lakna, ruihhlo khuahkhirh leh infrastructure hmasawnna leh kawng inkalpawhna ṭha nei turin hma la zawk turin an phut a ni. Thabah chuan Khasi Jaintia Hills-a rel luh tir an duhloh chhante hi sawiin, ram leilung fate dikna chanvo venghim turin dan khauh tak siam a ṭul a, Inner Line Permit (ILP) leh Meghalaya Safety and Security Act (MRSSA) hman ṭangkai a ṭul thu pawh a sawi bawk.

Thabah hian ILP siam pawh ram hmasawnna tiṭhuanawp thei nia sawi awm chu a pawm loh thu sawiin, ILP hmanna state-ah te per-capita income a san thu a sawi. Mizoram, Nagaland leh Arunachal Pradesh te chuan ILP system hi an kalpui tawh a ni.