Rijiju-a'n Naga helte chetdan a dem

Union Minister of State for Home Kiren Rijiju chuan Pathiannia Nagaland, Mon district, Changlansu-a Assam Rifle tui chawi motor lambun a, mi pariat thihna thlentu helte chetdan chu a dem thu a sawi.

Khaplang-a kaihhruai Nationalist Socialist Council of Nagaland (NSCN-K) helte chu lambuntua rinhlelh an ni. NSCN-K hian March 27 khan kum 14 chuang sorkar laipui nena inkahhai thuthlung an lo neih tawh chu chhunzawm duh loin an hnukkir a, April 2-a Arunachal Pradesh, Tirap district-a sipai convoy lambunnaah an inhnamhnawih tawh bawk a, hemi ṭum hian sipai pathum kahhlum an nih bakah mi pathumin hliam an tuar a ni.

Rijiju chuan thilthleng chu ram venhimna aṭanga thlirin thil ngaihmawhawm tak a ni tih sawiin, security force te chu a ṭul anga an chetchhuah tur thu a sawi.

"Assam Rifle te thihna thleng chu a vanduaithlak hle a, pawikhawihtute hi ka dem tak zet a ni. He thilthleng hian hmarchhak biala remna leh muanna a awm theihna atana sorkar hmalakna pawh a nghawng ngei ang," a ti.

Hetihlai hian NSCN-K telna hmar­chhak hel ṭangrual, United National Liberation Front of West South East Asia (UNLFWSEA) chuan Pathiannia Assam Rifle convoy lambuntu a ni tih a puang.

Assam hel, Paresh Baruah-a kaihhruai United Liberation Front of Assam (ULFA-Independent) chuan thuchhuah a siamah NSCN (K), ULFA (I), KLO leh NDFB (S) hel ṭangrual, UNLFWSEA-in Assam Rifle te hi an lambun a ni, a ti.

ULFA (I) helpawla publicity secretary Arunodoy Asom chuan NSCN (K) hotu, SS Khaplang-a kaihhruaina hnuaiah April 17 khan UNLFWSEA hi din a nih thu a sawi.

Assam Rifle pariat thihna thleng chungchangah Nagaland sorkar chuan boruak thlithlai turin MLA Naiba Konyak kaihhruai high-level team te chu Thawhṭanni khan Mon district-ah a tir nghal. Team-ah hian home commissioner Sentiyanger Imchen leh DGP L.L.Doungel te pawh an tel a, Mon district DC Honje Konyak leh district SP Imsusangba Sangtam bakah Assam Rifle officer te chu meeting an neihpui.

High-level team chuan mipuite chu chiai lo tur leh helte chinchang an hria a nih chuan police te hnena thlen turin a ngen.

Pathianni zan khan Mon district DC leh SP chuan Assam Rifle te lambunna hmun an tlawh tawh a, Changlangsu mipuite chu thlamuang taka awm tur leh muanna a awm theih nan security force te ṭha taka thawhpui turin an ngen bawk.

Monyakshu sub-division-a khaw 10-a tlawmngai pawl ṭangrualte chuan Assam Rifle te chunga pawikhawihna thleng chu an dem thu sawiin, helpawlte chu an sub-division huam chhunga tharum thawhna thlen tawh lo turin an ngen a, a thleng nawn leh a nih chuan mipuite'n a ṭul anga hma an lak tur thu an tarlang.

Tlawmngai pawl ṭangrualte chuan remna leh muanna an awm theih nan sorkar chu theihtawp chhuaha hma la tura an phut thu an tarlang bawk.