Zeliang-a'n Nagaland thil-thleng sorkar laipui a hriattir

Delhi-a cham mek, Nagaland Chief Minister T.R Zeliang chuan Pathiannia Mon district-a mi pariat thihna thlentu, Assam Rifle tui chawi motor pahnih lambun a nih hnuah Nagaland-a dan leh thupek dinhmun chungchang sorkar laipui a hriattir.

Chief Minister Office (CMO)-a official chuan Chief Minister Zeliang hian Union Minister of State for Home Affairs Kiren Rijiju hmuin Assam Rifle te chunga thilthleng leh Nagaland-a dan leh thu­pek dinhmun te a hrilh a ti.

Chief Minister Zeliang chuan NSCN-K helte'n inkahhai thuthlung an ziah chhunzawm loh chung­chang sorkar laipuiin Na­galand sorkar a hriattir lo chu a lungawi loh thu Rijiju hnenah a thlen bawk.

Rijiju chuan he thil hi Ministy of Home Affairs (MHA) meeting-ah sawi­chhuah a tum thu a sawi a, NSCN-K helte inkahhai thuthlung ziahpui leh tura Zeliang-a'n sorkar laipui a ngenna pawh MHA meeting-ah hian ngaihtuah a nih tur thu a sawi.

Pathiannia Assam Rifle te chunga thilthleng chungchangah Nagaland cabinet chuan state Par­liamentary Affairs minis­ter Kiyanilie Peseyie kaih­hruaina hnuaiah emer­gency meeting a nei nghal a, thilthleng chu an dem thu leh tharum thawhna chuan harsatna a sutkian loh tur thu a tarlang.