Gogoi-a'n sorkar laipui a sawisel

Union Minister for Road Transport and Highway Nitin Gadkari-a'n Assam-a kawngpui project kalpuina atan sorkar laipuiin cheng vaibelchhe 8,000 a ruahman thu tunhnaia a sawi chu Chief Minister Tarun Gogoi chuan UPA sorkarin Assam tana a lo ruahman tawh a ni, a ti a, Prime Minister Narendra Modi-a kaihhruai sorkar chuan Assam tan project leh scheme thar engmah a la ruahman loh thu a sawi.

"Union Minister eng emaw zatin Assam leh hmarchhak state dangte an tlawh tawh a, thutiam tam tak an siam tawhin mah se a taka tihpuitlin erawh a la awm lo a ni," tiin Gogoi chuan BJP kaihhruai NDA sorkar a sawisel.

Union Minister Gadkari chuan UPA sorkarin Assam tana a lo ruahman tawh puangin, a hmingṭhat­na chan a tum mai a ni, tiin Assam Chief Minister chuan a sawi bawk.

"Tun thlengin sorkar laipui chuan Assam tan budget-ah sum a la dah lo a, eng head hnuaiah nge sum kan hmuh ang tih hi tun thlengin kan la hre lo a ni. Hna thawh kawngah harsatna kan tawk mek a, sorkar laipui chuan North East Industrial and Investment Promotion Policy (NEIIPP) hnuaia fund kan hmuhte a titawp tawh bawk a ni. Policy chu a titawp nge tih kan hre lo a ni. Hemi chungchangah hian sorkar laipuiin policy mumal tak a neih loh avangin hmarchhak bialin kan tuar a ni," tiin Gogoi chuan a sawi.

Hmarchhak state tam zawk chu BJP rorel lohna state a nih avangin central-a BJP kaihhruai NDA sorkar chuan an thuneihna chhuhsak a tum a ni, a ti.

Hmarchhak mi Union Minister te chu an ṭangkai lo em ni? tia thuthar theh­darhtute zawhna chu Gogoi chuan chhangin, "Tangkai lo ka ti lo a, pawi­sa kan hmuh chuan an ṭangkai a ni mai," a ti.

Union Minister Gadka­ri-a'n Maharashtra-a toll gate aṭangin revenue tam tak an lakluh thu a sawi chungchangah Gogoi chuan toll gate chu Maharashtra, Gujarat emaw Delhi-ahte chuan a siam theih thu sawiin, hmarchhak state leh Assam te state rethei an nih avangin toll gate kalphung chu a hman theih loh thu a sawi a, Assam, Koliabhomora leh Raha hmuna toll gate an siam tawhte chu an khar tawh thu a sawi.

Chief Minister Gogoi chuan sorkar laipui chu sumdawng liante hlawkna atana scheme hrang hrang siamah a puh a, Union Minister Gadkari-a'n kawngpui project kalpuina atan mimal ram laksakna senso chu state sorkarin a tum tawh ang tia a sawi chu Gogoi chuan a sawisel bawk.