NE tourism hlawhtlin nan Buddhist hmun pawimawh hman theih : PB Acharya

Tripura, Nagaland leh Assam Governor Pad­manabha Balakrishna Acharya chuan hmarchhak biala Buddhist sakhaw hmun pawimawh awmte chu tourism industry hlawhtlinna remchanga hman theih a ni, a ti.

"India ‘Look East’ policy-ah hmarchhak bial chu a luhka a ni a, hmar­chhak bial leh kan ṭhenawm rama Lord Buddha zuitu tam tak awmte chu remchanga hmangin hmarchhak bial tourism industry hlawhtlin nan a hman theih a ni. Buddha khan thisen far khat pawh chhuak loin mi tam tak rilru a hneh thei a, India chuan Buddha zuitu tam tak a nei hi a vannei hle a, hei bakah hian a ṭhenawm ram, Thailand, Korea, Bhutan leh Japan-a Buddha zuitu tam tak awmte hi a vanneihthlak a ni, a ti.

Hmarchhak bial ramri tehkual hi kilometre 5,687 a thui a ni a, heng zinga kilometre 250-a thui chauhin India ram state dangte a ri a ni. A bak kilometre 5,437-a thui chu ṭhenawm ramte an inri-na a ni. China nen ramri kilometre 1,300-a thui a inṭawm a, Myanmar km 1,643, Bhutan km 516, Bangladesh km 1,880 leh Nepal ramri kilometre 97-a thui a ni.

Buddha Purnima puala Thawhṭannia thuchah a sawiah Governor Acharya chuan Gautama Buddha zirtirna ṭha tak tak chu khawvel puma puandarh ṭha a tih thu a sawi.

Hmarchhak biala Buddha Jayanti lawmna pui hi Arunachal Pradesh-a Tawang Monastery-ah neih a ni. Tawang Monastery hi kum 1681 khan din a ni a, India rama Buddhist monastery lian berte zinga mi a ni. Buddhist learning leh cultural studies hmun­pui atana hman niin, khualzin hiptu pawimawh tak a ni bawk.