MHA-in AP-a AFSPA hlih chung-chang a ngaihtuah ang: Rajnath Singh

Union Home Minister Rajnath Singh chuan Arunachal Pradesh-a Armed Forces Special Powers Act (AFSPA) hlih dan tur chungchang ngaihtuah a nih tur thu a sawi.

All Arunachal Pradesh Students Union (AAPSU) chuan he thu hi tarlangin, tun hnai khan New Delhi-ah Home Minister Singh an hmuh thu leh AFSPA hlih phuta memorandum an thehluh thu an tarlang.

Singh chuan Arunachal Pradesh district pakua bakah Tirap, Changlang leh Longding district-a AFSPA an lekkawh chu a taka kalpui a la nih loh thu a sawi, tiin AAPSU thuchhuak chuan a tarlang a, AFSPA lekkawh tur chungchang chu Arunachal MP, Union Minister of State for Home Affairs Kiren Rijiju sawipui a tum thu leh hemi hnua thutlukna siam an tum thu a tarlang bawk.

AAPSU president Kamta Lapung chuan tribal te inrelbawl dan khauh takin dan phal loha chetna a thlawp loh thu sawiin, hei vang hian AFSPA hi ṭul a tih loh thu a sawi.

Hetihlai hian North East Students Organisation coordinator Pritam Sonam chuan Arunachal MP Rijiju-a Union Minister-a lakluh a nih chu Arunachal mipuite tan thu lawmawm a nih laiin Union Minister of State for Home Affairs atana lakluh a nih aṭanga AFSPA lekkawh a ni nghal chu vanduaithlak an tih thu a tarlang.

Union Ministry of Home Affairs chuan March 27 khan thuchhuah siamin, Arunachal Pradesh district 12 chu Armed Forces Special Powers Act (AFSPA) lekkawhin, disturbed area-ah a puang a ni.

Hemi chungchangah hian state sorkar chuan sorkar laipui thutlukna siam chu an hriatpui loh thu Chief Minister Nabam Tuki-a'n a sawi a, sorkar laipuia thuneitute nen inbiakna an neih hnuah remna an siam tawh thu April thla tawp lam khan an tarlang.

State sorkar leh sorkar laipui inremna angin MHA chuan March 27, 2015-a AFSPA lekkawhna thuchhuah a lo siam tawh chu a hlip ang a, disturbed area-in a huam, district 12 chu district 9-a police station 16 huam chinah sawrzim a ni ang. District 9-a Arunachal-Assam ramria kilometre 20 bial chhung disturbed area-a dahna chu kilometre 30-a a bial tihzau a ni bawk a, district pathum - Tirap, Changlang leh Longding district te chu disturbed area-a puan a lo nih tawh angin a district pumpui chu disturbed area-a dah chhunzawm a la ni zel ang.