Assam: Rs vbc 7,000 tichengpentu Dipankar Barma man

Assam Police te chuan Pathianni tlailam khan Rs vbc 7,000 tih chingpenna, DB Stock Borking scam-a mawhphurtu bera puh, Dipankar Barman chu Goa-ah an man.

Guwahati Commissioner Police (CP) Diganta Barah chuan Barman-a hi Guwahati police, Panbazar Assistant Commisioner (ACP) Amit Mahato kaihhruai team-in man tih a sawi.

Guwahati police te chuan Barman-a hi Guwahati Police District (CGPD) ten Goa Police crime branch puihnain Goa-ah an man tih social media lamah an tarlang bawk.

CP Barah hian Pathianni zan dar 10 khan police team-in a chenna hmun aṭanga Dipankar Barma an man lai video clip hi a rawn pho lang. Video clip dangah Barman-a'n bag hrang hrang aṭanga Rs 500 tel a la chhuak laite a lang bawk a ni. Barman-a bang aṭang hian pawisa bakah rangchak ṭhi leh passport te pawh an man tel bawk. Pawisa fai an man hi Rs vbc 2.7 chuang a ni.

Barman hi DB Stock Broking neitu nia inchhalin, a pung tam tham tak pek a tiam avangin firm-ah hian mi tam takin pawisa an dah a ni. Mahse sum dahtute hian a intiam huna pawisa an hmuh kir tak loh hnu leh, August 21-a Guwahati-ah a office chu a inkalh vek leh, amah pawh chin hriat loha a bo zui tak hnuah mi a bum dan hi hriatchhuah a ni ta a ni. Barman hi chin hriat lohin a bibo zui a, police-ten man tumin ngawrh takin an zawng nghal a, thla hnih chuang an zawn hnuah Pathianni tlai khan an man thei ta a ni.

Barman hi nimin khan Gao court-ah hruia a ni phawt ang a, hemi hnu hian Guwahat-ah hruaiin, Assam chanchina pawisa hmanga inbumna lian tham ber zinga mi a thlentir hi chhui zui a ni ang.