Nagaland : NSCN-in sorkar laipui thutlukna duh lo

Nagaland helpawl, National Socialist Council of Nagalim (NSCN) chuan thuchhuah an siamah, India sorkarin India-Myanmar ramria inkal pawhna, Free Movement Regime (FMR) inremna siam tih tawp a, ramri hung a tum chu an duh loh thu an sawi.

FMR inremna hi kum 56 liam taa siam a ni a, hemi hmang hian Naga mite chuan India-Myanmar ramri chu zalen takin an kaltlang thei a ni. Mahse sorkar laipui chuan hei hi ti tawp a, ramri hung vek hi a tum a ni. NSCN chuan an duh lohna chhan hrang hrangte an tarlang bawk.

NSCN chuan FMR hi hun rei tak hman a nih tawh avangin Naga mite tan ramri lehlam ve ve ah an hnam nuna bet tlat thil a awm a ni an ti. FMR hi nuaibo a nih chuan Naga mipuite inlungrualna a ti chhe thei dawn a, Naga hnam ro hlu zah lohna a ni, tiin inṭhen hranna hial thlen thei a nih thu an sawi.

International border siamna tura 1952 Indo-Burma treaty ziah a nih dawn khan Naga mite chu rawn a ni lo tih NSCN chuan an sawi.An thlahtute ram chinah chuan daidanna awm loin zalen takin an kal ve thei a ni tiin, Naga mite chuan eng sorkar leh pawl hnen aṭang mahin an ram china kal kual turin phalna lak an ngai lo tih an sawi a ni.

NSCN chuan Naga mipuite chu ramri daidanna siam tura hmalakna chu thlawp lo turin an ngen a, contractor leh hnathawktute pawh ramri hung tura tih ah hian inhnamhnawih lo turin an chah bawk.