Manipur: Police-ten helpawl mi 9 man

Manipur Police-ten valley district hrang hranga beihpui an thlakna kal zelah helpawl mi pakua an man. An mi mante hi United National Liberation Front (UNLF-Pambei group) leh People's Liberation Army (PLA) mi leh sa an ni.

UNLF (P) mi mi pariat an mante chu dan phalloh pawikhawihna hrang hrang, mipui vantlang vau leh tihṭhaih bakah Thoubal district huamchhunga ramri siamna tur an tihbuai vanga man anni. An pawl hi sorkar nen inremna kawng zawnga inbiakna nei lai mek an ni a, mahse heti chung hian an mi leh sa ṭhenkhat hi dan kalha chetna hrang hrangah an la inhnamhnawih reng a ni. An kut aṭang hian ralthuam leh digital device te mansak an ni bawk.

Ralthuam an man zingah hian AK 47 Rifle pathum, AK 56 Rifle pahnih, M-16 Rifle pakhat, 9mm Pistol pakhat, AK mu 147, M-16 mu 20, 9mm mu 29 bakah mobile handset 16 leh Fortuner SUV, registration awm lo an man tel.

Police-te hian beihpui an thlakna dang, Imphal area-ah PLA mi leh sa pakhat, dan phal loha pawisa khawna inhnamhnawih chu an man bawk. An mi man hi Moirangthem Maniton Singh a ni. Police-te hian an mi mante leh an kut aṭanga thil an man sakte hi police custody ah dah mek niin, thubuai siamsak an ni ang.

UNLF(P) hian November 29, 2023 khan sorkar nen inremna thuthlung an lo ziak tawh a ni.