Tripura: CM-in zirlaite ragging-a inhnamhnawih lo turin chah

Tripura chief minister Prof. Dr. Manik Saha chuan Thawhlehni khan college hrang hranga zirlaite chu zirlai puite tihnawmnahna, ragging a fihlim turin a chah.

Tun hnaiah Agartala-a Tripura Medical College leh Dr. BRAM Teaching Hospital-a zirlai lut tharte chuan zirlai senior zawkte lakah ragging an tawk nia sawiin police-te hnenah FIR an thehlut a ni.

Chief Minister Saha chuan, media lam aṭangin ragging thleng chungchang hi a lo hriat thu a sawiin, official-te pawh be nghalin dan ang takin hma lak nghal a ni, a ti. "Ragging hi pawm theih a ni lo. Tunah chuan a khapna dan pawh a awm a, zirlai zawng zawngte chu ragging lama inhnamhnawih lo turin ka chah cheu a ni. Dan lekkawh zel a ni dawn. Sorkar laipui pawhin hemi chungchang hi ngun takin a thlithlai reng ani. Eng zirna inah mah, eng chhuanlam hmang mahin ragging hi pawm a ni dawn lo," tiin a sawi.