Delhi-ah hmarchhak zirlaiten lungawi lohna lantir
Manipur-ah remna leh muanna a awm thuai theih nana hma la tura sorkar laipui leh state sorkar phutin, hmarchhak zirlaiten October 29 khan Jantar Mantar, New Delhi ah lungawi lohna an lantir.
Zirlaite hian Manipur tualchhung buaina chhuak avanga mahni in chenna chhuahsan leh, hmun danga sawn chhuahte pawh anmahni in ngeia an let leh theih nan hmalak sak turin an phut. Thla 18 chhung buaina a thlen tawh avangin state chhunga zirlaite leh ṭhalaite nunphung a ti buai tawh hle a ni, an ti.
Jantar Mantar-a lungawi lohna lantir hi Manipur Innovative Youth Organisation (MAIYOND) leh United Kakching Students (UNIKAS) huaihawt niin, thupui atan 'Save Manipur- No Compromise on Manipur's Territory Integrity' tih an hmang a ni. Nawrh huaihawt hi North East Students Society, Delhi University aiawhte pawhin telpuiin, hmarchhak zirlaite chu inlungrual turin an ngen.
Society member-te chuan ṭhalaite leh zirlaite hmakhua an ngaih thu sawiin, sorkar laipuiin thla 18 lai buaina a chhuah tawh hnu pawha a chinfelna tura hma a la ṭha tawk lo leh, mipui 60,000 chuang camp hrang hranga awm te harsatna a ngaihven ṭha tawk lo chu an lawm lo hle tih sawiin, heng buaina zawng zawng hi awlsam taka chinfel theih a ni, an ti.
Nawrh huaihawtna hmunah hian historian leh geopolitical analyst Abhijit Chavda pawhin thu sawiin, "Manipur a remna leh muanna thlen chu kan ngaipawimawh tur a ni. A leilung fate pawh an inhriatthiam lohna te dah ṭhaa lungrual taka an awm a ngai a ni. India duh dan leh, Manipur leilung fate duh dan pawh thil thuhmun vek a ni," a ti.
Thusawitu dang, Col Kishore (Retd) chuan sorkar agency-ten buaina hi chinfel tumin hma an lak mek thu leh chenna in nei mumal lo te dinhmun leh tawrhna an hriatpui thu a sawi a, thil sual titu leh pawikhawihnaa inhnamhnawih zawng zawngte chu man vek an nih tur thu a sawi bawk.
He hunah hian Col Shanti Kumar Sapam (Retd), social activist Elizabeth Kh leh Rajshree Kumari leh Dr M Ojit Kumar Singh, Delhi University Assistant Professor te pawhin thu an sawi a ni.