Meghalaya: Nakkumah Shillong Medical College hawn tum

Meghalaya sorkar chuan Shillong Medical College (SMC) chu nakkum, kum 2025-ah hawn theih an beisei tih a sawi.

Health minister Ampareen Lyngdoh chuan SMC sak hna hi an thawh chak thu a sawi a, harsatna dang awm loa tluang taka an thawh theih chuan nakkum September thlaah chuan hawn theih beisei a nih thu a sawi. Hemi rual hian medical institute-a pawmsak tur chuan tih tur hmabak eng emaw zat an la nei. National Medical Commission (NMC) lam pawhin a hmunah hian an la endik lo.

Medical institute-a pawm tur hian khum 400 awmna hospital bakah hmun awl zau nuam takte, a thawktuin an mamawh ang tawk an neih tel a ngai a ni.

Lyngdoh chuan PA Sangma International Medical College-ah Meghalaya tana quota dah, seat 64-a zir tur hian Meghalaya aṭangin zirlai 200 chuangin an dil niin a sawi. Zirlaite hian MBBS course zir tur hian kum khatah tuition fee-ah Rs nuai 4.75 an pek a ngai a, course zir zawh nan hian Rs nuai 24.75an seng a ni. State sorkar chuan heng zirlate hi sum lama puihna tur pek dan a ngaihtuah mek.